13 уми октябри соли 2020 дар толори МИҲД-и ноҳияи Роштқалъа таҳти раёсати раиси ноҳия Назаршозода Лоиқ ва муовини раиси ВМКБ Амирбекзода Назира ҷамъбасти натиҷаҳои рушди иқтисодиву иҷтимоии ноҳияи Роштқалъа дар нӯҳ моҳи соли равон доир гардид. Дар ҷаласа муовинони раиси ноҳия, роҳбари дастгоҳи раиси ноҳия, органҳои ҳифзи ҳуқуқ, раисони Ҷамоатҳо ширкат варзиданд.

         Муовини якуми раиси ноҳияи Роштқалъа Вафо Ниёзмамадов оид ба натиҷаҳои рушди иқтисодиву иҷтимоии ноҳия дар 9 моҳ гузориш дод. Аз рӯи масъала раиси ноҳияи Роштқалъа Назаршозода Лоиқ фаъолияти ҳар мудирони идораву муассисаро таҳлил намуд.

Муовини раиси ВМКБ Амирбекзода Назира суханронӣ намуда, ба тамоми шаҳрвандони ноҳияи Роштқалъа барои бо сарбаландӣ гузаронидани маъракаи муҳими сиёсӣ-интихоботи Президенти Ҷумҳурии Тоҷикистон сипосгузорӣ намуд. Инчунин дар суханрониаш қайд кард, ки сокинони ноҳияи Роштқалъа дар иҷрои Фармони Президенти Ҷумҳурии Тоҷикистон “Оид ба даъвати тирамоҳии ҷавонон ба сафи Қувваҳои Мусаллаҳ” омодагии пурра дида, нишон доданд, ки насли навин баҳри ҳимояи ватани азизашон ҳамеша дар сафи пеш мебошанд.

Дар фарҷоми ҷаласа муовини раиси ВМКБ Амирбекзода Назира аз номи Гвардияи миллии Ҷумҳурии Тоҷикистон ба раиси ноҳияи Роштқалъа шаҳодатнома ва  медали ҷашнии “25-солагии Гвардияи миллии Ҷумҳурии Тоҷикистон” –ро тақдим намуд. Инчунин ба 4 нафар сарбоз мактуби миннатдорӣ ва ба сержанти хурди Гвардияи миллӣ Ифтихорномаи Гвардияи миллии Ҷумҳурии Тоҷикистонро бо тантана супорида, ба волидон ин фарзандон, ки содиқона дар сафи Қувваҳои Мусаллаҳи Ҷумҳурии Тоҷикистон адои хизмат намуда истодаанд, изҳори сипос намуд.

                                                                    Шарифаи Бунёд